Gələn ildən Azərbaycan Yaşıl kartları Gürcüstan və Qazaxıstanda satılacaqdır

2022-ci ilin iyun ayında Beynəlxalq Bürolar Şurasının (BBŞ) Belqrad şəhərində keçirilmiş 56-cı Assambleyasında Azərbaycan Milli Yaşıl Kart Bürosu funksiyalarını həyata keçirən İcbari Sığorta Bürosunun (Büro) fəaliyyəti yüksək qiymətləndirilmiş, beləliklə 10 illik keçici hüquqlu üzvlük müddəti tamamlanmadan, 5 illik müddətdə Büro BBŞ-nin tam hüquqlu üzvü seçilmişdir. Eyni zamanda üçüncü şəxslərə dəymiş zərərlərin ödənilməsi, öhdəliklərin zəmanəti kimi BBŞ-nin müəyyənləşdirdiyi xarici bankda yerləşdirilmiş 5 000 000 Euro vəsaitin geri qaytarılması təmin olunmuş, vəsait Büronun Azərbaycan banklarında olan hesabına transfer edilərək investisiyaya cəlb edilmişdir.

"Fins.az" xəbər verir ki, bu, İcbari Sığorta Bürosunun yaydığı məlumatda bildirilir.

Qeyd edilib ki, Büro tərəfindən Gürcüstan və Qazaxıstan Respublikasında qeydiyyatdan keçmiş nəqliyyat vasitələrinə Azərbaycan Yaşıl Kartlarının satılması üçün BBŞ-yə rəsmi müraciət göndərilmiş və razılıq əldə edilmişdir. Razılığa əsasən 01 yanvar 2023-cü ildən etibarən Yaşıl Kart sığorta şəhadətnamələri bu ölkələrin nəqliyyat vasitələrinə Azərbaycan sığortaçıları tərəfindən satılacaqdır. Xidmət ixracı anlamına gələn bu fəaliyyətdən yerli sığorta şirkətlərinin önəmli miqdarda mənfəət əldə etmələri gözlənilir.

Cari ildə həmçinin Azərbaycan və Türkiyə Yaşıl Kart sığorta sistemləri inteqrasiya olunmuşdur. Bununla da Azərbaycana məxsus avtomobil Türkiyə, həmçinin Türkiyənin nəqliyyat vasitələri Azərbaycan gömrük məntəqələrinə daxil olduqda Yaşıl Kartın etibarlılığı elektron qaydada müəyyən edilir. Büronun təşəbbüsü ilə həyata keçirilmiş inteqrasiya dünyada ilk belə təcrübə olmaqla, saxta Yaşıl Kart sığorta şəhadətnaməsi ilə sərhədləri keçmənin qarşısını alır. 

Büro cari ilin 11 ayında Yaşıl Kart Sistemində xaricdə baş vermiş yol-nəqliyyat hadisələrinə görə 531 000 manata yaxın, xarici vətəndaşların ölkə ərazisində törətdiyi sığorta hadisələrinə görə isə 95 000 manatdan artıq ödəniş həyata keçirmişdir. Xaricdə baş verən hadisələr üzrə ən böyük ödəniş Almaniya ərazisində qeydə alınmış və 31.586,37 manat təşkil etmişdir. Xarici vətəndaşların iştirakı ilə Azərbaycan ərazində baş vermiş hadisələr üzrə isə ən böyük ödəniş 23.000 manat olmaqla Rusiyanın payına düşür.  

Qeyd edək ki, Birləşmiş Millətlər Təşkilatı Avropa İqtisadi Komissiyasının Yol Nəqliyyatı üzrə İşçi Qrupunun nəzdində fəaliyyət göstərən Yaşıl Kart Sistemi 1949-cu ildə beynəlxalq nəqliyyatı asanlaşdırmaq və bu sistem çərçivəsində zərərlərin tənzimlənməsi üçün yaradılmışdır. 01 yanvar 2016-cı ildən İcbari Sığorta Bürosu Beynəlxalq Bürolar Şurasına üzv olan milli Yaşıl Kart Bürosunun funksiyalarını həyata keçirir. Büro Yaşıl Kart sistemi üzrə əlaqələndirici, ixtisaslaşmış təşkilat kimi fəaliyyət göstərməklə, Beynəlxalq Yaşıl Kart Sistemində Azərbaycanı təmsil edir.

Mənbə:Fins.az